ئەحمەد شەرع، مەرسوومێ ژمارە 13 یێ سالا 2026ێ دەرێخست، کو تێدا جەختێ ل سەر وێ یەکێ دکەت کو وەلاتییێن کوردێن سووریێ پشکەکا سەرەکی و ڕەسەنن ژ گەلێ سووریێ، و ناسنامەیا وان یا کولتووری و زمانی پشکەکا نەڤەقتیاییە ژ ناسنامەیا نشتیمانییا سووریا ئێکگرتی.
ب پشتبەستن ب ئەحکامێن ڕاگەهاندنا دەستووری و ل سەر بنگەهێ پێدڤیاتییێن بەرژەوەندییا بالا یا نشتیمانی، و ژبەر ڕۆل و بەرپرسیارەتییا دەولەتێ د بێهێزکرنا ئێکڕێزییا نشتیمانی و چەسپاندنا مافێن کولتووری و شارستانی یێن هەمی وەلاتییێن سووریێ، ئەڤ بڕیارە هاتنە دان:
ماددەیا 1: وەلاتییێن کوردێن سووریێ پشکەکا سەرەکی و ڕەسەنن ژ گەلێ سووریێ، و ناسنامەیا وان یا کولتووری و زمانی پشکەکا نەڤەقەتیایە ژ ناسنامەیا نیشتمانییا سووریا ئێکگرتی.
ماددەیا 2: دەولەت پابەند دبیت ب پاراستنا فرهچەشنییا کولتووری و زمانی، و مافێ وەلاتییێن کورد مسۆگەر دکەت د زیندووکرنا کەلەپوور و هونەرێن وان دا، و پێشخستنا زمانێ وان یێ دایکێ د چارچۆڤێ سەروەرییا نیشتمانی دا.
ماددەیا 3: زمانێ کوردی وەک زمانەکێ نیشتمانی دهێتە هژمارتن و ڕێ دهێتە دان ب وانەگۆتنا وی ل قوتابخانەیێن حکوومی و تایبەت دا ل ئەو دەڤەرێن کو کورد ڕێژەیەکا بەرچاڤ ژ ئاکنجیان پێکدئینن، وەک پشکەک ژ پرۆگرامێن بژاردە یان وەک چالاکییەکا کولتووری و پەروەردەیی.
ماددەیا 4: کارکرن ب هەمی ئەو یاسا و ڕێکارێن نائاسایی یێن کو د ئەنجامێ سەرژمێریا سالا 1962ێ دا ل پارێزگەها حەسەکە دروست ببوون دهێتە هەلوەشاندن، و ڕەگەزنامەیا سووری دهێتە دان ب هەمی ئەو وەلاتییێن کورد یێن ل سەر ئاخ و وەلاتێ سووریێ دژین، ب "مەکتوومولقەید" ژی ڤە (ئەوێن ناڤێن وان د تۆماران دا نینن)، دگەل یەکسانکرنا وان یا تمام د ماف و ئەرکان دا.
ماددەیا 5: جەژنا "نەورۆزێ" وەک بهێنڤەدانەکا فەرمی ل سەرتاسەری سووریێ دهێتە دیارکرن، وەک جەژنەکا نیشتمانی کو گۆزارشتێ ژ بهارێ و برایەتییێ دکەت.
ماددەیا 6: دامەزراوێن ڕاگەهاندن و پەروەردەیی یێن دەولەتێ پابەند دبن ب گرتنەبەرا گۆتارەکا نیشتمانی یا گشتگیر، و هەر جورە جوداکارییەک یان پەراوێزخستنەک ل سەر بنگەهێ ڕەگەزی یان زمانی ب یاسایێ دهێتە قەدەغەکرن، و هەر کەسەکێ هاندانا فیتنەیا نەتەوەیی بکەت ل دویف یاسایێن کارپێکری دێ هێتە سزادان.
ماددەیا 7: وەزارەت و لایەنێن پەیوەندیدار بەرپرسن ژ دەرئێخستنا ڕێنماییێن بجهئینانێ یێن پێدڤی بۆ بجهئینانا ئەحکامێن ڤی مەرسوومی، هەر لایەنەک ژی ل دویف تایبەتمەندیا خۆ.
ماددەیا 8: ئەڤ مەرسوومە د ڕۆژنامەیا فەرمی دا دێ هێتە بەلاڤکرن و ژ ڕێکەفتا دەرکەفتنا وی وەرە کار پێ دهێتە کرن.
