ئەڤرۆ رۆژا چارشەمبی 1/14، ب سەرپەرشتیا مەسرور بارزانی سەرۆکێ حکومەتا هەرێما کوردستانێ، جڤاتا وەزیرێن هەرێما کوردستانێ ئێکەم کۆمبوونا سالا نوو ئەنجامدا.
د کۆمبوونێ دا، گەنگەشە ل سەر کورتیا بارودۆخێ دارایی یێ سالا 2025 هاتە کرن، هەروەسا بارودۆخێ دارایی یێ هەرێما کوردستانێ بۆ سالا دارایی یا 2026 و کارکرن بۆ مەزاختنا مووچەیێن پاشکەفتیێن هەرێمێ و شایستەیێن دارایی یێن هەرێما کوردستانێ ژ لایێ وەزارەتا دارایی یا حکومەتا فیدراڵ ڤە، هاتە بەحسکرن.
د ڤێ دەربارێ دا، ئاوات شێخ جەناب وەزیرێ دارایی و ئابووری، ڕاپۆرتەکا هویر و تژی ژ زانیارییان ل سەر بارودۆخێ دارایی پێشکێشکر، دەربارەی داهات و خەرجیێن سالا دارایی یا 2025 و پێشبینی و ئامادەکارییان بۆ سالا دارایی یا 2026.
جڤاتا وەزیران تەئکید کرەڤە کو پێدڤی یە حکومەتا فیدراڵ هەردوو مووچەیێن مەها یازدە و دوازدە یێن 2025 و مووچەیێن نەهاتینە مەزاختن یێن سالێن 2023 و 2024 خەرج بکەت، کو بێی چ بیانوو و ئەگەرەکێ یاسایی و دەستووری نەهنارتینە؛ چونکی مووچە مافەکێ یاسایی و شایستەیێ مووچەخۆرێن هەرێمێ یە و حکومەتا هەرێمێ و خەلکێ کوردستانێ دەست ژێ بەرنادەن. هەروەسا دادگەها بلندا فیدراڵ ژی تەئکید ل سەر وێ چەندێ کریە کو پێدڤی یە بابەتێ مووچەی تێکەلی کێشە و ناکۆکییان نەهێتە کرن. ب تایبەتی ژی کو هەرێما کوردستانێ ب سەرکەفتیانە ڕێککەفتنامەیا سێ لایەنی یا هنارتنا پەترۆلێ بجهئینایە و رۆژانە ب تێکڕا 220 هزار بەرمیلێن پەترۆلێ ڕادەستی کۆمپانیا (سۆمۆ) کرینە و د بازارێن جیهانی دا هاتینە فرۆشتن و داهاتێ وێ ب کاش د گەنجینەیا وەزارەتا دارایی یا فیدراڵ دا وەک داهاتێ کۆتایی هاتیە تۆمارکرن. ئەڤە سەرەڕای هنارتنا پشکا گەنجینەیا فیدراڵی ژ داهاتێن نەپەترۆلی یێن هەرێما کوردستانێ و ڕەوانەکرنا تەرازیا پێداچوونا هەیڤانە بۆ وەزارەتا دارایی یا فیدراڵ. لێ دگەل ڤێ چەندێ ژی، وەزارەتا دارایی یا فیدراڵ چ پارە ژ تەرخانکریێن هەرێمێ بۆ خەرجیێن بکاربرن و وەبەرهێنانێ د یاسایا بودجەیێ عێراقێ دا نە مەزاختینە، هەرچەندە تەرخانکرنا دارایی ژی هەبوویە.
هەروەسا جڤاتا وەزیران دووپات کرەڤە کو بۆ سالا دارایی یا بهێت، دێ پێدڤی بیت د یاسایا بودجەیێ فیدراڵی دا پشکا بودجەیێ هەرێما کوردستانێ بهێتە دەستنیشانکرن و وەزارەتا دارایی یا فیدراڵ پابەند بکەن کو پشکا بودجەیێ هەرێمێ بهنێریت وەک هەرێمەکا دەستووری و فیدراڵ، کو ب گۆرەی دوایین سەرژمێریا عێراقێ یا ژ لایێ حکومەتا فیدراڵ ڤە هاتیە ئەنجامدان، ڕێژەیا ئاکنجیێن هەرێمێ پتر ژ 14٪ـە و دێ پێدڤی بیت پشکا بودجەیێ هەرێما کوردستانێ ب گۆرەی وێ ڕێژەیێ بهێتە دیارکرن.
د تەوەرەکێ دی یێ کۆمبوونێ دا، گەنگەشە ل سەر پێشڤەچوون و بەردەوامبوونا بجهئینانا ڕێککەفتنامەیا سێ لایەنی یا هنارتنا پەترۆلا هەرێما کوردستانێ هاتە کرن، کو د سێ هەیڤێن دووماهیکێ یێن سالا 2025 دا ب شێوەیەکێ سەرکەفتی ژ لایێ حکومەتا هەرێمێ ڤە هاتیە بجهئینان و ڕێککەفتن ژی بەردەوامە و هاتیە نووکرن. ل سەر ڤێ چەندێ، کەمال محەمەد وەزیرێ سامانێن سروشتی، داتا و زانیاریێن پێدڤی دەربارەی بڕێ پەترۆلا هاتیە هنارتن و داهاتێ هاتیە بدەستڤەئینان ژ فرۆتنا پەترۆلا هەرێما کوردستانێ پێشکێشکرن.
جڤاتا وەزیران لیژنەیا دانوستاندنێ ڕاسپارد کو چارچۆڤەیێ دەستووری، یاسایی و دارایی بۆ ڕێکخستنا بابەتێ بودجە و شایستەیێن دارایی یێن هەرێما کوردستانێ ل سەر بنەمایێ ماف و دەستهەلاتێن دەستووری یێن هەرێمێ ئامادە بکەت، داکو ببیتە بنەمایێ گەنگەشە و دانوستاندنێ دگەل لایەنێن سیاسی یێن عێراقێ بۆ پێکئینانا کابینەیا نوو یا حکومەتا فیدراڵ. هەروەسا ژ نوکە و پێڤە، لیژنەیا دانوستاندنێ ب هەماهەنگی دگەل فراکسیۆنێن کوردستانی د جڤاتا نووێنەران دا و وەزیرێن کورد د جڤاتا وەزیرێن عێراقێ دا، ب هەڤپشکی دگەل حکومەتا فیدراڵ کار بکەن پێخەمەت دابینکرنا شایستەیێن دارایی یێن هەرێمێ، ب تایبەتی ژی مووچە و شایستەیێن دارایی یێن مووچەخۆرێن هەرێمێ.
هەروەسا هەردوو وەزارەتێن دارایی و ئابووری و سامانێن سروشتی و شاندا دانوستانکار هاتنە ڕاسپاردن کو بەردەوام بن د بجهئینانا پابەندییان دا و چ بیانوو و سەدەمان بۆ حکومەتا فیدراڵ نەهێلن بۆ پاشخستنا مەزاختنا شایستەیێن دارایی یێن هەرێمێ.
